Agosto 4, 2012

Paglalayag

Huling sulyap,
baka sakaling dumating;
isang
huling lingon
sa labindalawang kahapong
pinagsaluhan natin.

Kailangan nang lumisan,
bakit wala pa rin?
makikita pa kaya?
ibulong mo sa hangin.

Setyembre 29, 2010

Sa U.P.

Ilatag mo gabi ang itim na tabing,
Humimlay ka araw hanggang sa mahimbing,
Umawit ng hele o maamong hangin,
Ang timyas ng buhay ngayon ay kapiling.

At doon sa silong ng sanlaksang tala,
Pinawi ang hapis at pangungulila,
Sa gitna ng dilim mundo'y pinayapa,
Nagniig itong puso, kalul'wa't diwa.

Setyembre 25, 2010

"Noli Me Tangere"

Minsan,
nangahas
ang paslit
na agawin ang
tinapay ng
kalarong marikit -
gustong mangulit.

Subalit,
maagap ang
kamay
na sagwil sa
lapastangang sunggab
nitong bubwit -
nagpupumilit.

Tuloy,
nabitin ang
takam
na gigil ng
sutil na nasang
ayaw papigil -
sa uulitin.

Setyembre 11, 2010

Tahimik

Sabihin mang
gumuho ang langit,
o umapaw
ang dagat ng tubig;

Sabihin pang
bumuka ang lupa,
o lumuwa
ang bulkan ng putik;

Ika'y tahimik.
At alam ko kung bakit.

Setyembre 5, 2010

Sa Ika-14 ng Pebrero 2003

tangan ko
ang bulaklak
ng pagsuyong
alay
sa
altar
ng iyong
pag-ibig

sambit
ang misteryo
ng tatlong taong
pagtanging
biyaya
sa akin

magtitirik
ng kandila
sa iyong
dambana,
nagsusumamo
sa pananalangin:

sa pagpanaw ng apoy,
wag mo akong limutin




Setyembre 2, 2010

Kung Sakaling Ako'y Mahimlay

Kung sakaling, Mahal, naisin
ng Maylalang
na sa araw na ito
ako'y mahimlay - di man ipahintulot
na kita'y masilayan - nais
kong ipabatid: hanggang sa huling sandali,
ikaw ang aking minahal,
minamahal.

Sapagka't sa piling mo, walang sandaling ninais
ko ang langit;
ikaw
ang aking lahat,
ang aking ngayon,
ang bukas.

Setyembre 1, 2010

Hatinggabi



Pagdaop ng mga palad ng orasan,
Liparin sana ng hangin ang isipan,
Patawan ng sa'kit ang buong katawan,
Nang ako'y makalimot kahit saglit lang.

Doon sa dulong sulok ng aking silid,
Kung saan dumaong ang aking daigdig,
Mata'y napako sa dilim ng kawalan,
Dagan ko ang sahig, ang dingding ay pasan.

Dati, pagsasapit ang gan'tong sandali,
Lango na sa rurok ng iyong pagtangi,
Ganap ang ligayang sa puso'y sumanib,
At walang pagsidlan sa iyong pag-ibig.

Subalit wala ka na - ako'y nilisan,
Tinanging pagsuyo'y sukat binitawan,
Samsam ang gunitang naiwan sa piling,
Hangal sa pag-asang babalik pa sa akin.